Pou Aude-Emmanuelle lo mo « marron » i vien dirèktoman dopi lo mo la lang éspagnol « cimarron » é sa i vé dir k’i sov dann bann gran-gran piton .Pou nou sa la komanss dopi komansman noute listoir kan dan l’ané 1663 dë franssé épi diss malgash la débarke dann la bé Sin-Pol.Bann franssé la rèss toussèl é bann malgash la parti maron.

Maronaz ? Ni pé panss ali konm dann noute listoir kan bann zésklav la parti maron pou koupe la shène lésklavaz, pou arète gingn lo kou dann bitassyon, é pétète ossi pou anlèv bann fam pou rofé zot vi dann bann sirk, défoi pou rotourn dann bann bitassion pou atake azot épi pou ramenn avèk zot lo pli éssèssèr pou zot. Avèk konm risk la bal d’in Mussard osinonsa d’in n’ote shassèr bann noir maron pou mète in poin final avèk zot vi.

Maronaz ? Ni pé panss ankor apré labolission lésklavaz konm lo rofi lo kontra d’travaye épi la roshèrch in lorganizassion otonome la vi dann kan-i di par moman apré 1848 l’avé dé foi ziska sink mil maron an fuite in pé partou dann La Rényon avèk lo risk i mète azot dan l a prizon pars konm angazé zot téi réspèk pa lo kontra signé avèk bann z’angaziss de gré osinonsa de fors.

Maronaz ? Sé galman la lite lé z’inn é lé z’ot konte linzistiss, lilégalité, linégalité,la frode zélékssion, l’oprèssion, la fuite dan léo- sé la lite formidab noute pèp l’améne pou défann noute lang épi noute kiltir rényonèz. Sé galman la lite pou lo dévlopman noute péi… So maronaz la la pankor fini é li va dir ankor lontan sanm pou mwin. Maronaz,Sé lo passé,sé lo prézan épi sirman ankor noute fitir.

A bon antandèr salu !.

NB. Mi oi lo maronaz konm la lite noute parti l’améné in pliské gran pèryode-D’apré zot Paul Vergès té pa inn an parmi noute gran maron pandan in bon koupe de tan ?