Badinaz i pé z’ète in plézantri, osinonsa kékshoz i fo pa pran o sèryé. Kan i di sa badinaz marmaye, sa i vé dir in pti zoué, sansa in pti zé, antouléka kékshoz i sava bien avèk bann marmaye é pa avèk gramoune.

Pou arvnir dsi noute kozman « maryaz la pa badinaz » ni pé dir sa sé kékshoz sèryé é i plézante pa ansanm sirtou dann tan mi anparl azot, lo tan d’ lontan. Téi koné pa kossa i lé in maryaz blan, sansa in maryaz pou la po d’patate. Zot i koné patate, zot i koné la po, é ni pé dir sé pa kékshoz bien konsékan — par rapor lo patate — si tèlman li lé minss, mèm li lé transparan.

Lé vré zordi, demoune i maryé pou in oui, pou in non, épi i divors pou lo mèm rézon, dsi in kou d’tète, sansa dsi in fantézi. I parl tazantan maryaz a l’éssé si tèlman koméla dann bonpé ka, maryaz i dovien badinaz é sé sa ké bann zansien téi vé pa.

Alé ! Mi kite azot rofléshir la dsi é ni rotrouv pli d’van, sipétadyé.

Justin