Médam zé méssyé, la sossyété, koz èk mwin sé koz èk in kouyon mé sé o pyé d’lo mir k’i oi lo masson.

Mézami yèr mèm, mi sava la boulanzri .Zot i koné koméla lo pèyman la fine modèrnizé. Touziss si li di pa ou konbien wi doi, mé li marke sinploman épi wi mète la moné dann in laparèye. Kélk’in i fé sa dovan mwin mé son moné i shape atèr é sé l’èr k’li di : Mashine-la i anvé d’mwin konmsi la mashine té in moune avèk in volonté-konmsi sirtou lo moune i vé pa pèrde la fass dovan lé z’ote pèrsone.

Issi la Rényon nou lé konmsa ; ni ézite pa pèrsonifyé in mashine ;Ni ézite pa done ali bann santiman imin mèm si ni koné sa la pa vré.

Alé ! Mi kite azot rofléshi la dsi é ni rotrouv pli d’van, sipétadyé.