Mi romarke an passan, si Maurice i fé toussa léfor, konm d’ote zil noute réjyon La Rényon i pran pa lo risk kass in zo dann foi pou dévlope son linformassion multi-lang — la pa li va pran la pène bouj in pé son korpyon pou inform in pé dsi noute péi. Zot va dir amwin dann kèl lintéré ? Lintéré k’ni kominike épi ni koné in pti pé sak i fé laba.

Antanssion la pa bann rényoné la fote bien antandi mé la fote i rovien so laparèye d’éta néokolonyal i kontante ali izol anou in maksimome… Nou va arvni la dsi pars ni vé ni vé pa nou la bézoin lé shoz i shanj in pé é firamézir la kominikassion i pass rante noute bann pèp dann sanss in bone konpréanssion é pou amenn anou dann in roflékssion indianosséanik.

Mi arète la pou linstan pars mi vé rakonte azot in kékshoz la étone amwin an bien. Alor figuir azot la méri Port-Louis la roganiz in kolèkt pou bann paléstinien la bann Gaza apré fé assassine azot dann, sak i fo bien apèl in krime konte limanité : 37000 mor é an parmi bonpé madam, bonpé zanfan épi bann vyèy pèrsone.

Donk bann Maurice la désside pass in kolèkt pou anvoye larzan pou bann palèstinien é momandoné la amontre in moune lo gouvèrnman épi in roprézantante l’ONU — organizassion bann nassion zini — apré romèrssyé lo gouvèrnman Maurice pou in don sink milion roupi pou soulaz la mizèr bann paléstinien. In bon zèst lo pèp maurice i panss konm nou in min i lav l’ote la pa in kozman vide.

A bon antandèr, salu !

Justin