Dann in sèrtin sans sa kékshoz konmsa i ral pa mwin tro. Lo rézon lé sinp : madam Desbassins l’avé plizyèr santène zésklav é konm toute bann propriyétèr zésklav sirman èl l’aplike dsi son bitassion lo kode noir avèk toute bann pinission téi sava ansanm... Biensir mi antan dir èl lété in bon métrèss pou son bann zésklav mé zésklav sé zésklav é zot téi viv, téi travaye, téi manz konm bann zésklav.

Toute fasson sak lé z’inn é lé z’ot va dir i sorte ar pa dann a boush bann zésklav, ni dann zot zékri… I paré k’in zour l’avé in moune téi trouv in pé drol lété bann shassèr téi rakonte la vi bann lyèv, é pa bann lyèv zot mèm. La réponss lé sinple, sé pars toultan bann lyèv i gingn ar pa ékrir sé lo shassèr kéva anparl de zot.

Parèye pou bann zésklav, mèm sète madam Desbassyns, pars sirésèrtin lo mètre si li rakonte listoir son bann zésklav sar touzour a son avantaz pa a sète bann zésklav trété konm zot lété trété dann in sossyété noute toute i koné kossa k’lété é sirtou alon pa obliye lésklavaz épi la trète, zordi é dopi la loi Taubira, sé dé krime konte l’imanité.

Ni sava pa fé léloj bann krimoinèl kant mèm ?

Mézami mi doute pa ké sak va monte mizé-la va travaye konm k’i fo an syantifik avèk lo bann prèv istorik ké zot néna a zot dispozission. Mi doute pa ké zot i sava pa fé in imne a la gloire lo krime noute zansète zésklav la soufèr mé mwin pèrsonèl mi oi mwin mal done in kou d’min pou fé in n’afèr konmsa, é mèm ète dakor avèk sak i sava fé sa.

Pou l’instan mi arète tèr-la, avèk in gran rogré dann kèr, avèk in bléssir dann kor par rapor la fasson la antèr la MCUR-in lidé jényal, in gayar projé, mor é antéré par lo bann zidé étroite déssèrtin moune issi La Rényon, mé i fodra ni anparl sa in zour.

A bon anrtandèr salu !

Justin