Demoune mon zénérassion la konète plizyèr prézidan dann la sinkyème répiblik. Si banna la pa pratike in politik bien avantazé pou bann travayèr épi pou bann pti kolon mé o mwins la zamé annarg azot, la touzour prann azot o séryé. Anou ni kroi sak ni oi-sak ni vé kroir — mé o mwinss pèrsone an parmi bann gran bononm-la la pa pran anou konm knatité néglizab.

Néna inn, lo promyé, téi apèl de Gaulle é kan li la vi lo pèp té pi dakor avèk son politik, li la lèv son kan épi li la parti-li la démissione konm Prézidan. Lé zot la aplike zot politik épi si tazantan la rann in pé sèrviss é tazantan la pa zoué in bon rol pou nou antouléka zot la zamé gouvèrn anou an provokassion.

La pa lo ka lo dèrnyé Prézidan, Méssyé Macron, li néna in èr d’paye ali noute tète : pèye la tète son bann promyé miniss épi son bann gouvèrnman, pèye la tète bann député épi bann sénatèr, pèye la tète bann zoinalist mé sa i rann azot éré, pèye la tète bann franssé é lé pa étonan banna i rézèrv ali, konm i di, in pti shien d’zot shiene.

Mi antan in député i di Lo prézidan i doi démissyoné. Sré normal si li lé dékonèkté konm li lé avèk la réalité imène bann franssé. Mwin mi panss i fodré li rode in Kolonbé lé dé zégliz pou li alé ropozé. De Gaulle o mwinss l’avé la dignité… Sa sé son poinnvizé pèrsonèl mé pa sète son pèp é-pétète li koné pa — mé li doizète lo sèrvitèr son pèp é lo méyèr sèrviss li pé rann bann franssé sé rann son tabliyé.

A bon antandèr salu !

Justin