Dan rényon-la l’avé in nouvo adéran é an parmi toute sak li la di, momandoné li la intéroz ali dsi la manyèr la trète -plito maltrète, bann kominiss dann péi-la. Biensir kan li la di sa, in kantité souvnir la romonte a la sirfass, konm pou rapèl amwin toute sak nou kominiss nou la passé é an parmi mi rapèl in zistoir Bruny Payet la rakonte anou dann tan li té pankor pass l’ote koté la vi..

Sa téi éspass dann la vil Sin-Pyèr é dann tan –la lo mèr té in dénomé gro-ta é bann nèrviss téi fé règn zot loi dann la mézon soidizan di pèp. Sé konmsa ké bann kominis l’avé poin lo droi rante dan la méri kissoi pou tir in fèye médssin sansa alé domann in papyé létasivil.

In zour troi militan pou arète lo dékourazman an parmi bann zéléktèr kominiss la désside rante dan la méri pou tir papyé é kan bann nèrviss l’ataké zot la riposté é d’apré sak i di zot la pliss doné ké gagné ziska zandarm i vien arète azot.

Donk Bruny i rakonte in l’avoka avoyé par lo parti la gingn lo droi vizite azot é zot la done l’avoka in sinp papyé pou done Bruny Payet é kossa té marké dsi ?Té marké : Mission akonpli, sommes an tol é noute kamarade la trouv sa éstralordinèr konm li téi di.

A bon antandèr salu !

Justin