Normal ! Toute marmaye i sava lékol. Konm i di néna in amontrèr dovan shak klass marmaye. Arzoute èk sa bann amontrèr lé kalifyé vi k’zot la parti in lékol formassion. Donk pa késtyon ral in boulé konmsa tro lontan déyèr lékol La répiblik… An dë tan troi mouvman l’afèr sar dann sak.

Mé mank de po, issi La Rényon néna touzour a popré lo mèm nonb zilétré.Dèrnyé shif ? San sèz mil an parmi bann demoune trant-sinkan la pass dizan dsi in ban lékol.Arzoute èk sa dann in gran péi konm La franss bann viktime so malédikssion-la sé bann klass défavorizé é si ni rogarde bien sé bann pèp loutre-mèr lé ankor pli défavorizé. Alor alor sré kant mèm bon k’i étidyé in pé sak ni pé apèl in maladi é sirtou bann moiyin pou konbate ali.

Astèr in pé i ézite pa mète la fote lilétrism dsi noute kréol rényoné, épi dsi lé zot lang bann péi d’outre-mèr mé pli fassil a dir k’a fèr. Antouléka sak lé sir sé ké lékol la pa fé konm k’i fo in konte avèk noute bann lang loutremèr ?In ésplikassion ? Pou bonpé rantre nou séin rézon sifizante é sé pou sa k’i fo done noute bann lang loutre-mèr la plass i mérite azot dann lédikassion noute bann zanfan.

A bon antandèr salu !