Ral piosh ? In bonpé d’moune la fé sa konm métyé dopi étan jenn ziska la fin. Souvan i apèl sa gongon d’soufranss si tèlman sa lé dir. Pou plézanté in pé i di sa guitar pars kan i bate dsi bate dsi in rosh sa i done lo la. Mé la pa toultan wi amiz avèk piosh, défoi wi gingn tour d’rin, défoi oute zanpoul i pète, défoi ankor la po i sorte.

Alor kan in pé la konète téi roporte la rotrète ziska laz Soissante-dé zan, zot la panss sa séi n labuzman — a pa konfonn avèk lamizman — mé kan la di i sava mète sa soissann-katran zot pti pé d’san téi bouye avèk la kolèr.

Alé ! Mi kite azot rofléshir la dsi é ni artrouv pli d’van sipétadyé.

Justin