Mézami koman zot i apèl in moune i boir lalkol ziska li pèrde son bann zékilib de baz ? In pé i apèl sa soular, bivèr d’rake, mwin mi di souvan lo moune sé in rakyé é fransh vérité mi pé dir azot mi apréssyé pa tro demoune konmsa.

Astèr mi mépriz pa non pli, mi koné lalkol sé in maladi pou in moune i gingn pa s’anpass tro konsomé. Mi koné galman si néna trètman konte l’adikssion-la, li lé pa touzour éfikass. Akoz pa in vakssin ? Akoz pa in bon trètman ? Akoz pa in roshèrch aprofondi dann domène-la ?

In zour nora mé boisson-la nora fine fé bokou d’tor noute sossyété… An atandan lo patoi i di néna in bondyé pou zot é souvan défoi zot i pass koté la mor san k’la mor i trape azot. Si shak foi in moune lé bu, la mor i ramass ali, ébin noré bonpé mor lo samdi soir, sansa la vèye in zour fèryé.

Alé ! Mi kite azot rofléshir la dsi é ni rotrouv pli d’van, sipétadyé.

Justin