Mézami ni pé dir baton néna dë boute : in koté li lé dann la min lo frapèr, l’ote sé pou done in raklé. La sossyété lé konmsa néna bann for, bann rish, bann abizèr dsi é l’ote koté néna lésploité, l’abizé. Si baton i shanj boute, zot i konpran kossa v’arivé.

Mé antanssion si ni kalkil bien lé pa pou ké lésploité zordi i vien lésploitèr domin, l’abizé zordi i vien labizèr domin. Mé si ni di sa sé in shéma la libérassion, sa i vé dir ni lite pou siprime lésploitassion donk pou aboli bann klass ésploitèz épi bann klass ésploité — pou aboli bann klass tou sinploman.

Normal, nou lé kominiss é ni vé in sossyété san klass san lésploitassion épi san l’abizman. Mi pé razoute san lo kolonyalism épi san linpéryalism.

Mi kite azot rofléshir la dsi é ni rotrouv pli d’van, sipétadyé.

Justin