Mi panss pa li téi parl pou son bann kandida issi La Rényon, mé sak lé sir sé ké bonpé l’poin dann son program é son program mèm lé pa frékantab pou nou issi La Rényon. Kan in kandida RN i di li lé pour la lang kréol, pou la kiltir kréol épi pou la divèrssité bann rolizyon, mi panss pa bann RN an Franss laba va suiv ali dann son lopinyon. Mwin lé mèm sir lo program RN lé bien kapab mète son bann kandida rényoné épi loutremèr dann lanbara.

La prèv nou la fine anparl kozman Johnny Payet kan li la di li fète pa lo vin déssanm mèm si apré li rotourn son veston. La prèv ankor kan la kandidate dézyèm sirkonskripssion i di bann tamoul épi bann mizilman na ka amenn zot vyann pou fé kui dann la kuizine santral mi oi pa bien koman i pé fèr in n’afèr konmsa é an pliss kan lo bann paran la fine pèye la kantine.

Astèr alon anparl in pé noute viv ansanm, mi oi sa konm in manyèr viv an sossyété lo jéni noute pèp la nyabou mète sa anlèr pou in bon lantante dann noute sossyété rényonèz épi in bon lantante an parmi noute pèp. I fodré pa bann RN laba i kass sa issi pars sak nou la nyabou fé konm par mirak si i kass avèk toute kalité mové lidé banna néna laba, sar dir pou nou rokonstruir.

Mézami banna laba lé an rotar dsi nou issi é sré bien si banna téi pran modèl dsi nou é pa nou dsi zot pars sré pa bon ditou sa pou nou konm lé pa bon pou zot laba zordi… Pou arvnir dsi lo kozman Bardella mi di azot franshman noute péi la pa bézoin zot movè zidé sirtou bann zidé rassist, omofob, ni élimine sa firamézir é banna laba zot i gingn pa.

A bon antandèr salu !

Justin