Kossa kozman-la i vé dir ?I vé dir opliss wi monte an-o dann la yérarshi politik, sossyal, osinonsa litérèr opliss demoune i oi oute défo pars wi panss la pi bézoin kashyète azot-mèm ou lé fyér oute défo. Grandyab téi anroul son ké dann son kilote pou pa fé romarke ki li lé.

Grandyab i koné fèr sa mé lo zonm o-plassé dann la sossyété li gingn pi fèr sa é li dévoil zot défo dovan toulmoune… Opliss mi di sa, opliss mi oi dovan mwin déssèrtin gran pèrsonaz. Konm ?Konm ki par ébzanpe ? Néna in bonpé konmsa mé zordi mi oi dovan mwin Prézidan La franss lo pli souvan.

Pou koué d’apré zot ? Pars oila in moune, li mète son péi dann in lanboulkidi pa possib é sé li k’i done lésson. Zordi li di bann shèf parti : zot i oi pa i fo zot i antann rantre zot, zot i oi pa dann kèl léta La franss i lé. Alor siouplé shakinn i mète in pé d’lo dann son vin épi i tir lo péi…dann malizé méssyé Macron la mète ali.

Pars sé kant mèm Macron an pèrsone ké la fé sa é li gingn pa ansorte ali toussèl si tèlman li la pran toulmoune pou dé zinkapab é pandan s’tan-la, konm i di, poisson i pouri par la tète é i gingn pa fé gran-shoz avèk poisson pouri. Sirtou pa tir in péi dann malizé é Lo malizé sa i diminyé pa avèk lo tan. An kontrèr sa i goumante zour an zour.

Astèr, pèrsone i koné pa oziss sak i sava spassé sirtou ké lo péi lé pa a l’abri d’in énorm kouyonade lo shèf i pé fèr zordi pou domin.

A bon antandèr salu !
Justin