Mézami, mi panss pa kozman-la sé in kozman popilèr rényoné. Mi koné pa non pli in zistoir rényoné avèk in sinz konm pèrsonaz prinssipal. Lé pa pars issi na pwin sinz : mi rapèl bien dan Zardin d’léta fitintan l’avé in sinz, marmaye té i kriye ali Kajou épi téi fé ali toute sorte mizèr. Mi rapèl galman dann tan l’avé zoo dan Shodron é pi l’avé sinz. Donk kréol noré pu invante in provèrb la dsi.

Lé vré sinz i amontr son déyèr é opliss li monte an otèr, opliss i oi bien son déyèr k’lé pa lo boute lo pli zoli néna dsi li. Sak mi rapèl sé in bataye politik : donk dann in parti l’avé in moune la vire son kazak é passito li la komanss monte an grade dann la sossyété é li l’amontre son défo.

Sak i vé dir kan ou lé a la baz, mèm si ou néna défo, wi amontre pa si tan tèlman, mé kan wi monte an grade, si ou néna défo, demoune i oi plizanpliss é sa lé zamé bon pou kélk’in sof si li lé pa la avèk sa.

Alé ! Mi kite azot rofléshir la dsi é ni rotrouv pli d’van, sipétadyé.

Justin