Mé malorozman déyèr lo papyé néna in l’administrassion é lo ladministrassion si wi réponn pa li, ébin sé li k ‘i rode aou, é si possib li mète aou in pénalité si tèlman olèrk ansorte aou konm k’i fo sé ou k’i mète aou dann l’éta lo poursuivi par l’administrassion.

Mi di azot sa, pars pou konpliké, zordi ladministrassion i vé sé ou k’i travaye pou li : sé ou k’i done ali ransègnman dsi ou li la bézoin, sé ou k’i di ali toute sak la modifyé, é sé ou final de konte lé anmayé avèk lo papyé.

Antansion, koméla li di aou l’afèr lé sinp ; i sifi ou néna lo linternet ; i sifi wi rouv in konte dann son ladministrassion é avèk sa, l’afèr lé rézoli, pars li gingn suiv aou san pène, partou oussa wi sava é kossa wi fé ; alor alé pa domann in papyé, pars sa lé dann oute konte é sé aou d’alé rode ali.

Toute fasson li koné ou néna in téléfone é avèk téléfone-la wi gingn alé rode toute papyé pou la bézoin mèm si bann zanploiyé i travaye pa an prézanssyél, mèm si kan wi sava dann l’administrassion wi trouv figuir-d’boi donk wi trouv pa pèrsonne pou réponn aou.

Final de konte, ladministrassion i koné la plipar d’moune léilétré késtyonn linformatik — i koné ou lé batu avèk sa, mé zot i panss ou va bien trouv in marmaye pou ède aou, sansa in biro minissipal mé sak zot i konte pa sé lo traka i mète aou d’dan. Mé oute traka konm ma gran-mèr téi di lé pa lo traka d’sissia.

A bon antandèr, salu !

Justin