Donk li di lo gouvèrman i rèss la pou règle bann zafèr kourante .Zafèr kourante.. Li téi panss mète in pé toute zafèr ladan é sirtou fé aplike son bann loi konte bann pov mé lo konsèye d’ éta i paré la fine inform ali i mète pa toute zafèr dann lo zafèr kourante é sirtou konm i di kan lé flou sé k’néna in lou kékpar é zistoman pétète ladan li téi vé zoué. D’apré mwin.

Astèr li di pèrsone la pa gingn zélékssion vi k’pèrsone la pa gingn la mazorité. La dsi toulmoune i pé z’ète dakor avèk li, sof in n’afèr, si bann zéléktèr la done in boush ta guèl sé bien lo Prézidan k’la gagané. Astèr méssyé i fé lo pédagog é li ésplike la pa in promyé miniss i fo trouvé mé in mazorité pou travaye pou « lo bien bann franssé » épi pou fé « bann réform indispanssab ». Malorozman kan in pé i di « réform » mwin mi antan konte-réform.

A bon ! dopi sètan li lé la é dopi sètan bann franssé la pa arète sèr zot sintir é astèr i fo trouv in mazorité pou travaye pou lo bien bann franssé. Mé pou komanssé i fo mète de koté Mélanchon é son bann épi Mme Lepen épi son bann. Pou garde in blok san bann zékstrème …donk bann néo-makronist..

E Bann zékstrème sé ki ? Sak lo parti Macron la mandyé la voi dézyèm tour pou anpèsh bann zéléktèr zète lo tou an parmi son bann. Zordi zot ékstrèm sé goumante lo smic sé sa lékstrémism, réviz la date dépar pou la rotrète sé sa léstrémism. Arète pouss la Franss dan la guèr sa sé lékstrémism ! Viol lo droi bann kanak wala k’lé bien rézonab, kroiz lo bra pou lèss bann lisraèl tyé bann palèstinien, viol la sourèneté Madagascar dsu bann zil épars wala kékshoz rézonab, kontinyé avèk lo sistèm néokolonyal ala sak i fo fèr. Alé marshé don !

Méssyé lo Prézidan koméla demoune i pran pi po d’shanm pou pla kouvèr, ni makaroni pou la bouji.

A bon antandèr salu !
Justin