Poète, fonnkézèr, maloyèr, plantèr, défanssèr noute lang,

Plantèr dori astèr, ala kékshoz mi yèm in ta !

25 mars, sanm Justin

Mézami kissa i yèm pa komanss la zoiné par in bon nouvèl ? Pa mwin pars mi ador sa. In bon nouvèl sa i klèr oute shomin, sa i di aou konmsa, wala in bon nouvèl pou ou. Wala in nouvèl i pé arienk mète oute kèr dan la joi. Ala pou kossa mi di azot in bon nouvèl pou komanss somenn issi. In bon nouvèl pou noute péi.

Kossa l’arivé ?

Sinploman néna in plantèr la nyabou ramass son ri é plantèr-la sé Daniel Waro, lo gran Danièl, lo fonnkézèr, lo shantèr, lo maloyèr, lo kontèr, lo rényoné, lo danssèr dann bal tamoul, lo tradiktèr d’ zorz Brassens si zot i vé… ébin li la mète li ossi pou plante deri é sa sé in n’afèr k’i fé plézir amwin, an réalité mi panss li fé plézir noute péi.

Pou kossa mi di sa ?

Sinploman pars sa sé in bon nouvèl pou nou rényoné, in nouvèl pou amontre anou, lé possib plante deri issi La Rényon, é ni pé ramass in bon kalité dori. La zoinalist i domann Daniel si sa i kontante ali ramass dori li la planté, li réponn oui, mé li azoute mwin sar pli kontan ankor kan dori-la va komanss shante dann son marmite.

Son kamarade Ti-fred i di konm dori-la la mète troi moi dopi lo plantaz ziska la rékolt, pétète i pé fé troi rékolt dan l’ané é pou li ossi sa in bon nouvèl pou nou si ni tienbo é si ni larg pa.

Pétète zot va dir amwin si mi konte raporte la nouvèl shak foi k’in rényoné va fé pouss dori, va mète ali an kroissanss, va ramass ali ébin mi pé dir azot oui, toultan Bondyé va done amwin la fors m’a rakonte sa bann léktèr zoinal Témoignaz é san rolash m’a rakonté pars mi panss mon péi lé kontan kan li aprann son zanfan i fé bon zafèr konmsa. E simon péi lé kontan mi pans i fo bate tanbour pou li.

Astèr zot va dir amwin si néna arienk sa pou kontante amwin, pou mète la zoi dann mon kèr, mon réponss sé non, la pa arienk sa, myé toute sak i kontante mon pé épi son bann zabitan mi panss i fo rakonté.

A bon antandèr, salu !

Justin

Padport

Signaler un contenu

Inn modékri, inn ti lavi, inn komantèr ?