Na pwin lontan mwin la parl lo Dyab épi Bondyé, épi lé dé ansanm dann in provèrb i di : « Bondyé i ofèr son paradi, lo dyab i ofèr son lanfèr » é toudinkou dann in sobatkoz lo soir zélékssion rante in fron nassyonal épi in fron popilèr mwin la antann in kozman la bote amwin bien é mwin la ropran ali mon fasson é sa i done sak zot i pé lir an-o la.

Pars o fon lé bien vré lo dyab i kashyète son mové lintanssion - idi galman li kashyète son ké - , konm fron nassyonal i kashyète son vré program é sa sé lo mèyèr manyèr pou foute anou d’dan si ni méfyé pa. Mé zot i koné, bann léktèr Témoignages sa lé prévni an longuèr d’ané é dopi 80 z’an pars noute zoinal néna son laz alor i fo vréman nou la anvi pou fé ramass anou konmsa.

Alé ! mi kite azot rofléshi la dsi é ni rotrouv pli d’van, sipétadyé.

Justin