Parl pi si la kolèr lo pèp i déklansh toudinkou. Mé i paré astèr bann franssé - sirtou sak i pé alé pran vakanss — la désside ramass zot kolèr pou la rantré. Mé néna in ta avèk in paké d’moune i gingn pa alé pran vakanss é a s’ki paré é sé bann politolog k’i di sa, zot lé paré pou rouv zot sak la kolèr toutsuite pou toutsuite…

Mi vann azot sa konm mwin l’ashté pars so matin mwin la antann dann zoinal parlé néna in bonpé d’moune la fine ashté biyé pou alé oir lo bann zéprèv ; ziska zordi la fine vann uite milyon biyé é i kontinyé vann.

Alor kossa i sava ranporte inn dsi l’ote ? La kolèr d’moune sansa lo plézir rogarde bann zéprèv sportiv ? Final de konte mi koné pa tro pars mi koné pa si la fé sondaz la dsi é si la fé kèl sé lo rézilta. Dabitide i sonde i déssonde, i rossonde mé dopi kék zour lo bann mashine a sondé lé konm k’i diré in pé an pane.

Romarke anou bien kan demoune néna la fyèv néna plizyèr solission ! I pé done médikaman. I pé lèss la maladi alé toussèl ! Osinonsa i pé kass lo tèrmomète konmsa i pé di dann zoinal la fyèv la tonbé. Pétète va fé konmsa ziskatan momandoné i di : sirpriz, sirpriz !

Macron d’apré sak i paré mwin la vi dann télé la parti fèr in tour dann péi zamérikin épi li la lèss toute la bann dskité-dispité mé mi panss pa la métode lé bone. Lèss kouvèrtir dsi lo marmite o fé lé riské sa non ? Épi konm mwin la di avèk zot lo pèp franssé sa pa la pa in pèp tro passifik sa é mi panss i fo méfyé son réakssion.

Afors alé a lo klbass i pète.A bon antandèr salu !

Justin