Pé sfèr zot i trouv in pé drole sak mi sorte ékri. Pé sfèr pou zot in kanpagn pou zélékssion éropéène i doi porte dsi in program pou l’Érop. Mé mi panss pa, pars pou nou rényoné, in zélékssion ninporte lakèl i doi anparl noute problèm é koman ni pé trouv in solission pou sa. Pars lé kant mèm irzan, ni mète anou dann sanss in vré dévlopman pou noute péi La Rényon biensir.

Lé possib bann gran parti épi zot roprézantan, kan zot i align bann shif, bann bidjé, bann z’ède, zot i panss zot la fé tou lo nésséssèr pou dépane anou mé a bien oir, noute péi lé an rotar d’dévlopman é bann voiyajèr d’passaz i dovré domann azot pou kossa noute péi lé pa pli dévlopé ké sa avèk son bann voiyan dann rouj konm i di souvan dann noute parti épi shé bann rényoné in pé trakassé par la sityassion La Rényon.

Mi trouv noute Parti kominiss rényoné par rapor lé zot néna in pozission orizinal kan li par dopi noute mal dévlopman épi li di i fo in plan fé par bann rényoné, pou bann rényoné é sa i konssèrn dizon toute zélékssion, mèm bann zélékssion éropéène : sé nou k’i doi fé noute plan d’dévlopman é si ni doi ède anou par nou mèm — sé noute devoir — i fo ossi l’éta franssé konm l’Érope i baz dsi noute plan rényoné pou ède anou dékolé.

Nou la pa bézoin i transporte issi bann problèm bann zéta éropéin i gingn pa rézoude laba shé zot. An kontrèr ni domann azot arète mète dézorde issi dann losséan indien — arète ésploite bann péi losséan indien, myé lèss anou épi noute bann voizin pou trape noute dévlopman otossantré. Sé sa k’va pèrmète anou ansorte anou, pa zote zidé azot, mé lé n’ote… pars nou néna la vanité d’kroir noute zidé d’dévlopman lé bon pou nou.

A bon antandèr salu !

Justin