Noute bann shantèr, noute bann zékrivin, noute bann kontèr i arète pa travaye pou noute lang avanssé — mi panss in liv Axel Gauvin la ékrir néna plizyèr z’ané é té i apèl « Du créole opprimé au créole libéré » - éditions Maspero. Mi panss galman in zoli fonnkèr Zanmari Baré i shante dsi la lang é mèm sonshanté ansanb-avek Daniel Waro. Sa sé shé nou, mé dann d’ote péi koman sa i éspass ?

In dalon dann parti la anvoye pou mwin lopinyon Pravind Jugnauth dsi lo kréol morisien épi son rol dann lo parlman : la Répiblik Maurice, mwin sré kontan dir lé shoz la fine bien avanssé mé malorozman i rèss ankor in bon boute shomin pou fèr.

Dev Virashawmy, in gran lintéléktyèl morisien mor néna kék somenn téi di, sanm pou li bann politik i gingn pa bien ansèrv kréol morisien. Pravind Jugnauth son koté, lo promyé miniss la Répiblik, i di mèm si li lé pou ansèrv kréolmorisien dann parlman li panss bann député, épi bann fonksyonèr i fo zot i sa aprann kréol dann l’inivèrsité konmsa zot va nyabou lir-ékrir dann kréol morisien. Boudikonte li panss sé inn késtyonn tan é i sèrv arien préssipite lé shoz.

Solon Pravind Jugnauth dann parlman séséloi la pran lo tan k’i fo pou ariv ansèrv kréol séséloi dann parlman. Maliss li azoute in romark Navin Ramgoolam, promyé miniss avan li, téi di kan téi poz ali lo mèm késtyon : « li la pèr bann dépité va mète a jir inn-a-l’ote » pars lé pli fassil jir an kréol ké jir dann la lang bann zanglé.

Astèr in késtyon mi poz amwin, la lang èl mèm kissoi morisien, kisso séséloi, kissoi rényoné épi d’ote, lé paré pou rante dann la vi piblik bien konm ki fo é bann lokitèr lé kapab bien ansèrv bann lang-la. Mwin pèrsonèlman mi panss noute bann lang la fine fé bonpé progré pou fé viv in bon bilinguism éfikass... mé sirman i fopran in pé lo tan..

A bon antandèr, salu !

Justin