Dopi in somenn nou — pa soman mwin — téi viv avèk lidé Fron Nassyonal i sava rantré é biensir nou téi panss lalite lo pèp i amenn dopi dé zané é dé zané avèk lo bann sikssé dsi lo plan kiltirèl épi la rézistanss dann lo sossyal téi sava kapoté… Dann mon lidé épi dann lidé in bonpé kamarade nou tréi sava bate aryèr. Sorte dann la limyèr pou artourn dann fénoir.

Mi kash pa dir azot mwin téi panss dë séktèr, la kiltir éoi lo sossyal, pou lékonomi mwin téi panss mèm pa si tèlman ni fé ké rokilé épi l’anvironeman parl pa dizon dopi Paul Vergès la tir lo signal d’alarme ni patine é ni patine é ni avanss pa franshman.

Mé astèr ni pé rodrèss la tète, astèr ni pé sorte dann fénoir épi rante dan la limyèr é sa sé in losson bann pti kolon noute bann péi i done anou. Sirman lo fron nassyonal la fé zérèr dann son stratézi, sirman afors li tortikye ali pou amontre in figuir prop demoune la koma, nous douté… Sirman li téi kroi li la fine gingn la bataye mé son manyèr avanss maské la komanss trakass lo moune : zordi li di si, domin li di sa, apré d’min sé in n’ote zafèr si tèlman demoune partou la panss « moune vilin néna ankor, moune kouyon na pi ».

Alé ! Alon kontante anou avèk bann bon nouvèl zordi. Domin sé in n’ote zour.

A bon antandèr salu !

Justin