Médam zé Méssyé, la sossyété koz èk mwin sé koz èk in kouyon mé sé o pyé d’lo mir k’i oi lo masson.

Mézami dann liv Daniel Honoré « somi-lo mo » mi sorte trouv lo kozman « kaniki sèrvèl kaniki léspri  », mwin pou mon par mwin la touzour antann dir sak mwin la marke an-o la. Romarke anou bien, « kaniki  » avèk pti sé lo mèm zafèr.

Mé kan mi oi kozman-la ékri kékpar, sa i fé panss amwin sak in proféssèr lalman téi di dsi lidéolozi bann nazi.I paré bann nazi téi panss opliss in moune néna in gro tète donk in grol sèrvèl opliss lo moune lé intélizan mé i paré, in zour, in sèf nazi lé mor é in dokyèr nazi la fé latopssi é kossa li la romarké pars son lotopssi té pou démontre bann téori nazi, mé wala ké lo boug mèm si li l’avé in bèl koko d’tète li l’avé in pti sèrvèl.L’èr-la lo téori la kass par bloute pars final-de-konte la pa la grossèr la sèrvèl i fé la grandèr lintélizanss.

Astèr mi konpran pa pou kossa in kozman konmsa la fé pou ariv La Rényon é kissa l’adopte in kozman konmsa pars bien évidaman sé in çoneri san lo sédiye donk in konri.

Alé ! Mi kite azot rofléshi la dsi é ni artrouv pli dvan, sipétadyé.