Mézami mi sorte trouv inn-dé romark dsi bann dépité éropéin lo RN é mi anvoye azot sa… pétète va fé rofléshir azot in pé. In promyé réflékssion i porte dski lo RN épi bann zvanssé féminist :

L’ané 2019 bann dépité l vote in rézolission dsi bann zékar d’salèr rante lé z’om épi lé fam é bin figuir azot Jordan Bardella la fé labstanssion é bann dépité RN la vote konte pars i par élété tro progréssist.

Momandoné la poz lo problèm lo arsèlman séksyèl an parmi bann péi L’érop mèm dann parlman éropéin, bann RN la vote konte konm pou di zot néna arien pou siré.

L’ané 2020 kan la diskite in loi la Pologne té i interdi bann madam dispoz zot kor konm zot i antan, toute bann dépité RN la done son akor pou lo prozé poloné ki interdi bann madam désside sak zot i vé pou zot kor.

Si néna bann zéléktèr féminiss i vé vote pou lo RN, mi panss i fodré zot i rofléshi in bon kou pars avèk bann zopinyon konmsa lé pa trop ti ni rotrouv anou an plin dann mwayinaz.

La ni sorte oir koman lo RN lé réakssyonèr dsi l’avanssé bann féminiss. Mi pé dir azot ankor banna lé konte lo droi di travaye épi zot lé pou bann apiye lo rin bann lobby kapitalist.

Mi arète la zordi mé si néna bann bononm épi bann madam progréssist dann noute péi ébin gate pa zot biltin pou vote RN — vote pou avanssé, pa pou rokilé..

A bon antandèr salu !

Justin