Fèr in fète dsi épi otour d’in produi sa i done lokazyon demoune oir sa dann télé, épi konète koman le moune i ansèrv sa konm nouritir, konm friandiz-bonbon, gato, farine, lo zi épi d’ote shoz ankor, san konté médikaman, pars konm souvan bann tizanyé i di anou dann télé, néna in bonpé fri, léguime, i pé ète bon pou noute manzé épigalman pou noute santé.

Kan wi sava dsi linternèt i di aou katrovin diss pour san lo chouchou sé d’lo, mé néna galman bann sèl minéro, bann vitamine épi d’ote shoz bien bon pou noute santé. Pou l’manjé shoushou sé brède osinonsa frékassé, sé lo frui, sé lo patate mèm si li lé rarli lé bien bon. Lontan téi fé shapo avèk bann fil i tir ladan… Zistoman in késtyon i vien dann mon tète :

Ni doi kontante anou sak i fé de toutan é sirtou pa obliye la rossète, sansa ni doi ankouraz bann zétide épi bann roshèrch pou in méyèr valorizassion. Mwin pèrssonèl mi panss la roshèrch i doi pa arété sirtou avèk toute kalité moiyin i manke pa nou, arzoute avèk sa bann kapassité demoune issi dann noute péi. Bien shèrché épi bienrodé avèk bann mashine apropriyé lé pa fé pou fèr anou d’tor. É si ladan san k’ni atann talèr i trouv in produi mirak ? I koné pa zamé sa.

Avan mète in poin final dsi mon modékri m’a dir azot in n’afèr mi koné pa si lé vré san pour san mé konm in moune la di amwin, mi vé partaz avèk zot : in madam l’amontre amwin in plato avèk plizyèr kalité chouchou dedan. Inn dan la bann lété kouvèr kou d’pikan é èl la di, dovan mwin sa sé lo promyé kalité chouchou l’ariv Salazie é apré sa avèk la kiltir, avèk la tèr, avèk lo tan sa la done in bonpé kalité varyété… blan, vèr pal, vèr fonssé, avèk zépine é san zépine, gro sansa pti.

Plizyèr dizène kalité antouléka.

Vré, pa vré ? Mi koné pa mé konm nou néna noute vokassion kréoliz toute sak i ariv shé nou, mi panss « ala ankor in mirak noute kréolizassion »mé la pa sir mwin néna rézon.

A bon antandèr salu !

Justin