Arienk si ni rapèl bann produi l’amontr dann télé, sansa dann zoinal, ni oi néna in kantité produi i vo la pène konète. Ni pé anparl la vaniye épi son bann dérivé ; ni pé galman parl lo thé épi la suite. Ni pé anparl kafé bourbon pointi épi lé z’ot. Ni obliy ar pa anparl lo myèl épi toute sak li ansèrv. Ni pé anparl zanana, pitaya, létshi, safran, é toute in kantité produi la kalité. Mwin la pa antandi dir téi sava parl noute bann tizane, domaz pars nou néna dé zarm dann bann tizane ossi.

Fransh vérité noute tèr rényoné néna bonpé partikilarité é sa i done bonpé produi intéréssan. I fo dir ankor dann la kanpagn La Rényon néna in savoir lé préssyé, é néna galman in savoir fèr. Kissa l’aporte anou sa ? Mwin mi diré sé noute zansète i sorte in pé dann toute kontinan é l zot l’amenn avèk zot sak zo téi panss téi falé pa pèrde an voiyaz konm patrimoine kissoi malgash, kissoi afrikin, komor, indien, éropéin, shinoi é d’ote é d’ote ankor.

Noute baz lé bon, nou néna pou avansé pou réissir mé tro d’kalpyé dovan la pate noute bann prodiktèr, é tro d’lésploitassion néokolonyal i romonte dann tan Colbert pou ki la koloni lé pa la pou dévlopé, mé pou ansèrv kontoir bann produi i sorte la franss... Mézami oila sak ni di dopi dé zané é na poinn gouvèrnman gosh konm droite pou ékoute anou in pé é fé lèv par la loi bann kalpyé néna dsi noute shomin.

Mézami nou néna la kapassité, la kalité, lo r épi lo savoir fèr, noute patrimoine lé rish épi divèrsifyé, alors kossa i manke anou ? I manke anou in shomin galizé pou nou alé dirékssion noute dévlopman épi sirtou la libèrté fé sak ni fé, san tro d’frin pou anpèh anou avanssé.

A bon antandèr, salu !

Justin