Salon l’agrikiltir Paris ? Ankor médaye pou bann rényoné. Mé bann problème de baz lé ankor bien prézan

29 févrié, sanm Justin

Konm mwin té apré ékri yèr, sirésèrtin, bann zékspozan rényoné dann Salon l’agrikiltir laba Paris i sava ranporte in bonpé médaye par raporte la kalité zot prodikssyon é fransh vérité banna i pé z’ète kontan : vinn-sis médaye sète ané olèrk dizuite l’ané passé. In bon rézilta é sirman banna nora pli bon rézilta dann bann zané k’i vien… La Rényon néna son bann talan. In pé ni koné, d’ote i mérite lo détour pou nou mèm rényoné épi pou toute sak i yèm dékouv bann nouvo produi épi bann nouvo gou. Bravo pou sak i s ote la mèr pou amontr lo gou La Rényon dann bann péi déor.

Dann lo mèm tan ni oi dann télé in roportaz dsi lo riz péi é koman li progrèss ti-dousman, ti-dousman é koman firamézir li l’apré instal ali dann lo péizaz agrikol rényoné. Biensir la pa ankor sa, mé sé bann promyé pa é bann promyé pa lé pa a néglijé. Mé la ni pé alé dann dê dirékssion, kissoi dann dirékssion la kalité épi lo gou, épi mèm la transformassio konm i fé pou d’ote produi. L’ote dirékssion sé koman manzé sinploman épi ranpli noute vante. Dann in shomin konm dan l’ote néna in gran shomin pou fèr.

Dann télé mwin la antann in vyé lansien — plantèr d’ri dann son zénèss — apré di « Porte antanssyon, ni manz dori é sa sé noute gou, noute labitid, noute kiltir mé kossa v’arivé lo zour bann péi prodiktèr va manz zot prop ri épi v’arète lésportassion ? ». Sir ké sa i pé arivé mé sir ké lo méyèr réakssion sé plante dori nou ossi shé nou épi aranj anou pou pa ké ni pé z’ète privé d’noute nouritir d’baz san ké ni réazi… Biensir ni pé shanj labitide, shanjnoute gou, shanj noute manyèr manjé mé sé pa kékshoz i fé fassilman.

Astèr-la nou lé an plin dann lotonomi alimantèr é sa sé finalman la klé noute l’alimanrtassion, in rovandikassion d’fon noute parti i porte dopi dé zané.

A bon antandèr, salu !

Justin

Padport

Signaler un contenu

Inn modékri, inn ti lavi, inn komantèr ?