Na poin lontan mwin la di in bon kamarade, pou kossa, li ossi, li ékriré pa pou noute zoinal é li la réponn amwin, sé pars li la pèr lo sindrome la fèye blansh é fransh vérité mi panss sa i pé fé pèr pou vréman. I paré sa i pé ariv toulmoune, idi konmsa bann gran zékrivèr zot mèm l’ariv azot pli d’in foi tranb dovan graton pou ékri in n’afèr dsi in fèye.

Mwin lé sirésèrtin in pé lé riskab dir amwin : koman lé possib ! Justin ké sa i ariv aou. Sa i fé talèr dizuitan, wi ékri zour pou zour dann lo zoinal défanss bann san défanss é sa i ariv aou ankor. Mézami mi souète sa va ariv amwin ankor lontan pars mi panss mon travaye sar fini kan d’ote moune zot ossi va gingn la pépiye, tazantan, pa toultan dovan in tèks alé konète pou kossa zot i gingn pa mète ba.

Poitan néna dé shoz é dé shoz pou ékrir, pou dénonssé, dann lo drol de monde koméla nou l’apré viv souvan défoi in trist réalité. Mé asoir lé konmsa : sak mi vé ékrir i sorte pa. Asoir lo sindrome la paj blansh la trape amwin é mi koné pa koman m’ariv a sirmonte ali. Poitan lo monde lé konm li lé torte, vilin, kass-kassé, mal fouti, kriyèl, méshan, mové… Mi yèmré bien asoir tir son défo… Mi voudré bien mé mi gingn pa.

Mé lo monde lé galman si tan tèlman intéréssan, gayar, ranpli avèk lo jéni l’imanité, son linvantivité, son batarssité, sa tandrèss, épi son kapassité pou rézisté... Asoir mi panss la boukle lé blouké… domin sé in n’ote zour é lo mashine va rodémaré.

A bon antandèr salu !

Justin