Mézami zordi mi souvien d’in kozman ma momon téi di sa kan mwin lété marmaye é kozman-la mwin lé siréssèrtin sa téi romonte dann tan mon momon lété jenn fiye, pétète avan.

Zot i koné nou dann la yabri — nassion yab — néna kozman dizon i apartien in fon d’kozman familyal. In légzanp ? Kan in moune lé gro la famiye i apèl ali Ti-tone é sa sé in mo zot i pé rotrouv dann lo roman Axel Gauvin — Bayalina — i pass dann Témoignages dopi in boute tan.

Pou rovir dsi noute kozman zordi, i rossanb pou mwin, kan lété lo zour oute fète-lanivèrssèr — ou l’avé l’droi fé inn-dé fantézi ou téi pé pa pèrmète aou in zour normal. La toléranss pou lo zour la, mé tanssion pangar si wi rokomanss sa in n’ote zour.

Astèr lo kozman sé inn manyèr anvoye aou baladé kan wi koz ; dizon konm jo dassin téi shante : « Alé sif la-o dsi la koline » sansa an kréol « Alé pouss kanar dan la déssante » é dsi sé zantrofète mi kite azot rofléshir la dsi, sansa non… konm zot i vé.

Ni artrouv pli dvan sipétadyé.

Justin