Konm de bien-antandi, zot i mète toute bann péi d’outre-mèr dann mèm panyé sak i fé ké partou la kour dé konte épi son bèl rapor i gingn arienk kritikassion é lé normal pars partou demoune l’outre-mèr i konpran pa pou kossa i krétik in sèl taks i alimante bidzé bann komine épi i protèz in pé bann prodikssion fète é fourni dann bann péi l’outre-mèr.

Sèryèzman méssyé déla kour dé konte akoz zot i désside pa détrikote bann zékonomi péi l’outre-mèr pou sèye savoir pou kossa noute dévlopman lé bloké. Pou kossa, konm ki diré, noute lékonomi i kontinyé fonksyone konm dann tan lo gran Colbert kan li téi di la koloni i produira pa in sèl klou pars li va lèss sa pou bann zantropriz la métropole.

Sèryèzman méssyé dé la kour dé konte, ou lé intélizanss ou, wi koné dé shoz ou, lékonomi mondyal na poin sogré pou ou… alor akoz wi mète pa oute bann talan pou étidyé bann blokaz lo dévlopman bann péi l’outre-mèr. Wala in mission kapab korèsponn avèk zot bann talan. In mission mi diré i konvien zot gran kapassité épi zot gran linvantivité.

Dir sak wi di, ékrir sak wi ékri, sé ansèrv oute gran talan pou fé dé shoz i vo pa la pène. Akoz zot i mète pa zot o sèrviss bann péi l’outremèr pou trouv sak i pé détake noute lékonomi, épi mète ali dann sirkui lo dévlopman. Mé pou komanssé akoz zot i ékoute pa bann pèpl’outre-mèr pou konète kossa zot i vé, kossa zot i éspèr, é dopi kan zot i atann sak zot i atann… sré pli proférab k’alé ravaz guèpe dann son ni — Zot i kroi pa ?

A bon antandèr, salu !

Justin