Mi pé done azot in bonpé légzanpe : a komanssé par lo tram-train. Lésirésèrtin si l’ané 2010 nou rényoné nou l’avé vote pou la liste Paul Vergès, lo tram-train l’èr ki lé noré té apré roulé dsi in bon boute La rényon épétète mèm dopi sin-Jo ziska sin-Bénoi é sa noré évite bann rényoné in bonpé dézagréman.

Mé la majorité d’moune la vote kont la list Paul Vergès é aprésa lo vinkèr, insèrtin Didier Robert, l’anonss dsou in tonèr l’aplodisman la fin lo tram-train. Konm li l’anonss la fin la MCUR, sansa ankor la fin mlo miks énèrzétik. Ni pouré ankor parl lipodrome pou fé la kourss shoval, l’aviyon pou transporte ui-san pèrsone… Paul Vergès lé pi la, é sirman mi vé pa fé roviv lo mor mé lé kant mèm bon, tazantan bann résponsab politik, konm bann zéléktèr i pinss azot in bon kou ziska los an pou zot révéyé épi konprann zot lé pou kékshoz dann toute sak zordi ni vé mé momandoné nou la kass sa avèk gou konm bann vyé moune i pé di.

Mé zot va dir amwin kossa k’i ansèrv bour lo kouto dan la plé konm mi fé la. Mon réponss sé pou évite anou kontinyé fé dé z’érèr ni rogrète par la suite… Zordi néna in prozé é prozé-la, mi jur azot sa lé bien ékstra, sé sète d’instal 280000 mini-santral éléktrik solèr dan la Rényon pou diminyé noute faktir, épi pou done kouran demoune épi bann zantropriz é sa mèm si in mové siklone i ariv… Poitan sanm pou mwin lopinion piblike lé pa prèssé oir in prozé konmsa arivé. Pétète in pé sré mèm kontan k’i fé pa poitan néna in mine d’or la dan mé zami é i fo ni rann anou konte vitman-vitman san lèss noute shanss passé.

A bon antandèr, salu !

Justin