Zordi sé lo résponsab lo RN pou La Rényon, lo mèr La plaine des Palmistes ki di toute sak li panss noute listoir é lo bann paz sak néna d’pli triste é pli dramatik : mi vé anparl lésklavaz épi la trète konm krime konte limanité dopi la loi Taubira la fine d’ète voté. Mwin lé sirésèrtin lo kolonyaliss pou zot sé in gran progré pou l’imanité.

Alor wala in mèr, résponsab in parti politik issi La Rényon, in kandida pou vnir dépité La Rényon i pé pèrmète ali d’dir li komémor pa labolission lésklavaz dan noute péi. Li razoute « pèrsonèlman » mé na poin arien d’pèrsonèlman kan ou lé mèr, résponsab in parti é kandida dann in zélékssion dépité.

Alor 20 déssanm 1848, pou ou sa i konte pa ! Labolission néna mil an solon ou ! Lo passé sé lo passé é wi rogarde dann la dirékssion l’avnir ! Mé wi done kou d’pyé dann la lite noute pèp l’améné pou ariv landroi ni lé zordi. Wi rann pa ou konte ou l’apré jire lo mémoir lo pèp rényoné ?

A ! biensir, son bann dalon i fé konmsi sé lo poinn d’vi pèrsonèl lo pèrsonaz épi zot i ézite pa krétik ali, mé pou nou sa i doizète konm in alèrte pars sak ni oi banna i di zordi mèm, lé pa di zot i fé pa domin é si zélékssion i done azot lo pouvoir kissa k’i di anou domin zot i sava pa éfass la loi Taubira par in n’ote loi ?

Tanka sak i di « i fo lèss azot zot shanss » mi trouv zot lé inpé san konprann pars si i mète azot o pouvoir, kèl kantité lo mal banna lé kapab fé in néstan pars boudikonte dann zot program kashé nou néna pou soufèr, nou néna bann droi pou rononssé, nou néna la mizèr pou konète an pliss... Konbien konkète sossyal v’aléi an fimé ? Pa par lo mèr La Plaine, mé par lo RN li mèm pars sé toute banna k’i panss konmsa é k’i majine in rotour an aryèr lé possib.

A bon antandèr, salu !

Justin