Donk toute la spass konm k’i fo é zordi la frèsk lé anplass. Ni pé di sa la spass normalman mé normalman sépa si néna in sanss issi dann noute péi. Pou kossa mi di sa ? Pars la pintir té pankor sèk — i pé di galman lo san té pankor séké — konm i di k’in pé la trouv a rodir é mèm zot téi vé fé tir lo zafèr dsi l’mir. Mi souvien sak in zour Paul Vergès l’avé di anou dann in rényon : li la di anou kan i parl la kiltir sirtou la kiltir dann in péi néo-kolonizé, tangaz-dézorde lé pa loin, pou pété.

Pou koué ? Pars zot i koné dann in péi konm La Rényon é in sossyété konm sète nou néna dann in réjime néo-kolonyal lé pa avoué mé solon mon léspèryanss li lé bien la é dopi dé zané. Néna demoune i di zot lé franssé é d’ote i di zot lé rényoné, mèm si noute nassyonalité sé franssé. Néna sak i sorte déor épi k’i panss lo bann méyèr franssé sé zot é final de konte konm nou lé pa fini sé zot k’i doi ashèv fini anou. Epi néna bann stratèz kolonio k’i travaye dann so guèr psikolozik ni viv dodan dopi dé tan é dé tan.

Astèr si ni anparl in kou noute kozman d’dépar : issi i amontr listoir mé konm i di listoir sé sète La Franss, é kan Zolikèr li poz ali késtyon dsi son passé pou oir kossa li pé fèr dann son fitir, li di dann li-mèm kom bonpé rényoné i fo ni aprann listoir lo pèp rényoné sèl bon métode pou nou konète noute passé é pou nou fé noute fitir… Mi panss pa Zolikèr lé konte listoir d’Franss dann lékol pars li koné bien sé sak i aprann dopi étan pti ziska nou lé fine gran, mé kan li intéroz ali, li mète lo doi dsi lo poin fèb noute lédikassion : noute péi lé absan, noute pèp lé absan, noute passé lé kaziman inkonu… Kossa k’i fé ké nou sé in pèp rényoné é koman nou l’ariv la zordi apré pliss troi syèk.

Sa i vo bien in kroi dsi l’histoire de France é in nouvo matyèr « zistoir noute péi » mé zot va dir lo problèm lé réglé dopi ké lo bann gran shèf blan la désside i fo pa toush lo gayar frèsk Méo la fé mé mi kriye pa viktoir : lé sir bann kolonio épi néo-kolonio la pa gingn la parti, mé mi antann parl d’in tèks « ésplikatif » konm pou done in zo bann révizyonist pou ronjé — mi trouv sa lé pa itil pars i fé konmsi bann révizyoniss la pa bien konpri… Zot la bien konpri a zot fasson é zot fizi lé o pyé pou linstan mé paré pou ansèrv in n’ote foi.

A bon antandèr salu !

Justin