Mézami mi domann amwin si sa sé in bon nouvèl pou vréman.
Pou koué mi di sa ?

Pars zot i koné bien ni plante pa lo blé épi i fodré ni produi si tan tèlman ké zordi pou domin mi panss sar difissil…
Arzoute in pé avèk sa si dann l’Érope sansa d’ote landroi la natir i anvoye anou ankor in gran kou d’kovid sansa d’ote maladi,
Osinonsa bann grann puissans i argingn lo gou pou fé la guèr si dann bann péi demoune i vé manz myé zot ossi zot i komande lo blé.

Mon bann dalon, mi panss zot i koné toute mon bann kozman dsi lotosifizanss alimantèr é mon konklizyon pou dir ni pé pa konte dsi baton tonton pou pass la rivyèr.
Biensir zot i pe dir amwin la pa arienk avèk lo blé i fé la farine, i fé ossi avèk mayi-pinm, avèk manyok, patate, frouyapin épi avèk bonpé séréal épi bonpé rassine… Mwin lé dakor mé si marmaye i manz do pain avèk la farine do blé tou lé zour, zot i panss in rokonvèrssion sar si fassil ké sa ?

I shanj pa réjime alimantèr konmsa !

A bon antandèr salu !

Justin