Konm na poin tète dé list issi La Rényon mé néna déssèrtin kandida dsi bann list banna té invité pou sobatkozé : l’avé sis zinvité. Ary té lo roprézan la list Léon Deffontaine — li lé trézyèm dsi la liste « la gauche unie pour le monde du travail ». L’avé sis zinvité pou débate dsi la késtyon La Rényon épi l’Érop, in sizé intéréssan.

Sak lété in pé étonan sé ké Rényon Promyèr ki pran la pène roganiz in déba la konporte ali konmsi li téi vé favoriz lo parti labstanssion — plizyèr sékanss té la amontr soidizan pèrssone lé pa la avèk sa… mé lé pa promyèr foi ni romarke la télé piblik souvan dé foi i fé lo vèr konmsa mi panss pou amontr son lorizinalité san danzé. Anfin mi oi sa konmsa sirtou kan zélékssion i ariv.

Noute roprézantan lo kamarade Ary la anparl Noute sityassion issi La Rényon é plizyèr foi li invite toulmoune pou rode par nou mèm la solission bann gran problèm noute pèp rényoné konm lo shomaj, la vi shèr, lo maldévlopman, noute lanvironeman ménassé, lo réshofman klimatik é pou li sé ansanm ni doi trouv lo bann solission k’i konvien a nou é pou défann sa dann l’Érop épi La franss.

Lé domaz pèrssone anparmi bann zinvité lété intéréssé pou lo travaye ansanm. Mé afors afors i fodra bien ni pass par la. Sé konmsi in pé i soussyé pa tro lo prézan épi l’avnir noute péi épi noute pèp osinonsa pa zordi pa domin, lo révèye lé riskab d’ète dir.

A bon antandèr salu !

Justin