Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Solèye t’a nout toute, Solèye pou nout toute

mardi 26 mars 2024, sanm Justin


Mézami kan nou lété an staz la Plaine des cafres somenn passé, néna inn rantre nou la di : « Pou goumante lo nivo d’vi inn famiye néna de solission : inn i fo la famiye i gingn pliss larzan é sa lé pa possib toultan sansa i fo la famiye i dépanss moinss, si i gingn i fo fé loe dë an mèm tan… »


Biensir nou té pa apré anparl lo boukliyé kalité-pri é nou té apré anparl lénèrji - si zot i vé nou téi parl lo kouran. Pars lé inkroiyab koman kouran lé plizanpli shèr… mé avan ariv la nou la anparl shof-lo solèr. Si zot i rapèl lo plan Paul Vergès, plan-la té fé pou diminyé lo pri lo-sho donk inn fasson pou bann famiye dépanss moinss pou lo mèm konfor.

Kan la désside sa, demoune la poz azot késtyon dsi son fézabilité é bonpé d’moune konm dabitide la trète Paul de révèr, é kossa ni oi zordi, néna issi la Rényon près de san mil shof-lo solèr é pèrsone i poz pi késtyon konmsa é anpliss ké sa, la fé sa prèss san doulèr sinploman fézan lékonomi dsi shof-lo kissoi éléktrik, kissoi o gaz.

Or shof-lo solèr sa i marsh avèk la shalèr solèye é solèye i done anou gratuiteman son shalèr, sof bann zinstalassion fo fèr avèk l’ède piblik épi larzan pou sak néna, avèk l’ède piblik pou sak na poin larzan mé antanssion : lé z’inn é lé z’ot néna lo mèm droi zot par dann solèye — finalman in bon projé kominiss é sé noute kamarade Paul Vergès té o komandman dann tan-la. Apré la rand shof-lo obligatoir é dann toute konstrikssion la mète shof-lo solèr. Si tèlman koméla néna sa partou an pagaye é pèrsone in souplègn pi pou lo pri lo sho.

Konm de koi, solèye t’a noute toute é nou la bézoin solèye pou noute toute mé noute kozman i arète pa la, é néna ankor pou di la dsi.

A bon antandèr salu !

Justin


Inn modékri, inn ti lavi, inn komantèr ?

signaler contenu


Facebook Twitter Linkedin Google plus