Donk oila k’in zour, dann tan-la, in gran famiye russ blan i pass dann in voitir atlé avèk in zoli shoval. Shomin pa larz, é mèm in pé kass-kassé. In famiye moujik — in famiye péizan —, zot ossi zot i marsh dsi shomin é lé bien difissil pou lo voitir bann gran Blan pou dépass azot, mèm kroiz azo. La famiye moujik i sèye dégajé pou libèr la plass pou la voitir passé mé lé pa fassil é opliss zot i bouj opliss zot i gingn pa rouv shomin pou lo famiye russ-blan.

Lo shèf famiye russ blan lé pa kontan parss sa i fé pèrde ali son tan préssyé é momandoné li di avèk son koshé ansèrv son gran foué pou dégaj shomin. Lo koshé mèm li sé in zanfan d’moujik li done bon kèr : li tape a gosh, li tape a droite, toute i pass granmoune, fam, zanfan shakinn i gingn son kantité é kroi amwin pou poiké la poiké.

Lo promyé garsson i oi in galé dsi lo bor shomin, bien blé, bien lour, li ramass sa pou li défann la famiye mé son papa i di avèk li, i fo pa fé sa pars la vi pou nou sar pi possib dsi la tèr bann russ blan. Sé noute déstin d’ète maléré épi maltrété konmsa. Anvoye pa rosh pars nou sar ankor pli maléré apré k’avan.

Lo gran garsson i di pa arien mé li ramass son galé pou lo ka k’in zour li nora pou ansèrvir... Lo tan i pass, i pass, i pass, é lo gran garsson néna touzour son galé avèk li. In zour néna la révolissyon é bann solda l’armé rouz i arète toute bann zésploitèr é bann zabizèr bann moujik la dénonssé.

Sé konmsa k’in zour lo moujik avèk son garsson i oi in sorte défilé é dan la bann, zot i oi lo russ-blan la fé done azot gran kou d’foué, garoté avèk la shène épi la korde galman. Lo garsson i trape son galé lété touzour avèk li épi li di avèk son papa : « zordi mi sava tir mon vanzanss pars i fo bononm-la i pèye pou lo sharjman kou d’fouète li la fé done anou »

Mé lo papa olèrk ankouraz son garsson dann son lanvi d’vanjanss i di avek li : « lé pa l’èr pou fèr sa zordi ké la révolission la fine trionfé. Lèss la révolission okipe banna é pou lo galé, zète pa li, ramass ali pars néna myé pou fèr avèk sa ».

A bon antandèr salu !

Justin