Médam zé méssyé, la sossyété, koz èk mwin sé koz èk in kouyon mé sé o pyé d’lo mir k’i oi lo masson.

Mézami zot i koné néna d’moune lé manyak é si la movèz shanss i vé ké wi tonm dsi li é k‘wi désside fèr oute vi avék in pèrssone konmsa é si ou lé pa manyak oute tour, mi prévien aou ou néna pou passé.

Sirtou mwin lé konm i diré in pé makote é toute landroi mwin la passé demoune la fatig mon tété… Mi rapèl l’armé kan noute lyètnan la anvoye amwin fèr in gran rovi d’sanm. Li la di amwin obliye pa pass lo doi dsi l’armoir, rogarde lo li si lé fète o karré, rogarde si linz lé bien ranzé dann larmoir étsétéri étsétéra.

Mwin la réponn ali, sa lé pa dann mon san sa é si wi vé fé sa alé fé ou mèm. Rézilta, kinz zour d’trou. Pars mi koné mon bann défo mwin téi vé pa razoute inn konm la marote suiv la poussyèr grin par grin. An pliss mwin lé pa doué pou fé sh… demoune.

Alé ! Mi koné pa zot, mé mwin, mwin lé pa ankonbré avèk mon makoteri.
Mi di azot sa rantre nou, é ni rotrouv pli dvan, sipétadyé.