Mi sava pa bassine azot avèk lo vote la fé yèr : in pé i doizète kontan avèk lo rézilta, in pé i doizète maladé avèk lo rézilta é pétète l’apré rode in bon kashé pou défémal la tète. I paré la démokrassi sé konmsa k’i marsh é i fo ni kontante anou avèk sak èl i pé ofèr anou.

Pou mwin zélékssion lézislativ sé pou règ — si i gingn — bann gran problèm in gouvèrnman i pé réglé, osinonsa li pé pa, mé antouléka li lé fé pou sa. Sof ké, mwin pèrsonèl, mi vé touzour k’i règ lo bann problèm mon péi é mon péi sé La Rényon konm zot i koné.

Antouléka mi admir sak i panss son dépité v’alé laba dann Pari pou règ bann problèm La Franss. Pétète li pé mète son grin d’sèl dann la rézolission bann problèm La Franss. Antouléka mi souète ali pars alé pass sépa konbien lo tan pou fèr in n’afèr i intérèss amwin solman dsi la marj mi panss mi gingnré pa.

Zot i koné kan mi rogarde in karte zéografi mi oi La Rényo — pars mi komanss par rogarde ali, konm in galé dann loséan indien mé in galé i konte bokou pou mwin. Mi oi ossi, l’indianosséani — sak mi voudré é ki égziss pa ankor — antouléka mi oi bann maskarègn épi noute bassin loséan indien avèk toute son bann problèm pou réglé…

Sa i anpèsh ar pa mwin alé oir bann rézilta an komanssa par sak i intérèss amwin an promyé. Apré m’a rogarde bann rézilta pou La RF é sirman m’a grate mon tète an dizan, koman zot i sava débrouye azot dann in n’afèr konmsa… Mé provi k’i done pa mon péi épi son lanvironeman pliss difikilté ké zot néna déza.

A bon antandèr salu !

Justin