Mé ni krash pa dsi La Rényon konm èl lé zordi pars d’inn fasson osinonsa d’in n’ote, sé lo konbanoute zoinal la améné ébien sir lo bann konba noute parti lamodèl ali, korij ali dsi lamarj mé korijé kant mèm… Mézami noute zoinal la pran par in pé toute bann konba éssansyèl lo pèp rényoné la améné… Mi ézite drèss la liste lo bann bon konba kominist épi rényoné nou la améné pars mwin lé siréssèrtin mi sava obliye bann konba inportan : katrovin zané lé long, é konbien konba dann son parkour diran toute so tan-la.

Mi pé site an vrak lo bann konba pou laplikassion la loi départmantalizassion, konba pou l’égalité, konba pou la liberté é konte la frode éléktoral, konba pou lotonomi é pou noute lidantité, lite pou défann lo kréol rényoné, lite kont lo kolonyalism, konte bann bidon-vil, konte légzil bann zanfan rényoné — sète La Kreuz épi lémigrassion tou kour — konba pou dévlope la kiltir épi l’édikassion, konba pou lo maloya, pou l’anvironeman… Mé konm mwin la di azot mwin lé sirésèrtin obliye in bonpé.

Antouléka sak ni pé dir noute zoinal la touzour été la pou défann bann bon prinssip de vi dann noute péi, é li la akonpagn noute transformassion dopi néna katrovin zané ziska zordi é bien antandi nou la pankor fini é nou sar fini lo zour nou v’ariv shanj la vi dann in bon sanss issi dan noute péi… Lo roulo konprèsssèr kolonyalist sansa néo nora kraz anou mé nou néna la réponss, sète Laurent Vergès in zour la doné : « Nou lé pa pliss, nou lé pa mwins mé réspèkt anou » — réspèkt anou pou toute noue bann konba pou la dékolonizassion ; Algérie, Vietnam ; Afrik di sid, Madagascar, Chagos, Palèstine…

Nou la viv dann kèr lo monstr é ni koné son zantraye mé noute flèsh sé la flèsh David konm José Marti é d’ote ankor noré di.

A bon antandèr salu !

Justin