Mwin l’avé souvnir lo tan la chanb komers l’avé in konsséssion dsi l’aeroport épi dsi lo por galman. Défoi ou na intéré vérifyé si la vérité d’yèr sé ankor la vérité d’zordi. Par l’fète koméla sé in sossyété k’i diriz l’aeroport avèk 60 % pou la par l’état, 25 % pou la par la CCI, 15 % pou konsèye réjyonal épi la komine Sinte-Mari… Lé vré dopi 1965 té la CCI téi gère a san-pour-san l’aéropor é in zour la fé in loi é la loi téi siprime la konsséssion la CCI épi téi ranplass sa par in sossyété striktiré konm lé marké an-o la.

An fète lo pouvoir sé l’éta k’i détient pars dann in sossyété si ou néna 60 % bann par, mi oi pa kissa i tape aou ladan. Inn bone shoz ? In pé va dir sé in ronassyonalizassion déguizé donk in bone afèr mé pou nou ansien koloni mi trouv pa sa si tèlman bon pars l’éta sé lo kolonyal é lo kolonyal ni koné kossa ké li vo épi koman li taye la lène dsi lo do mouton é koman li aranj ali pou anpèsh noute dévlopman ékonomik. Inn fasson anpèsh anou gingn in pé pliss lotonomi ni arète pa réklamé.

Ala pou kossa mi di sé inn fasson pou l’éta d’rokoloniz noute péi é sa sé in n’afèr i konvien pa nou pars lo prinssipal pozèr d’pyèz dann noute dévlopman sé l’éta. Mé lo dézolan sé ké demoune la pa protésté, la pa manifèsté pars ni yèm bien done l’éta bann shèk an blan é apré lé tro tar pou réaji. Sèryèzman mi panss l’éta i sorte foute anou dann in pyèj é la pa sir ni sa sorte dann bone kondission ladan.

A bon antandèr salu !

Justin