Kan nou lété marmaye, mèm jenn jan, nou l’avé l’abitid shaboul galé : kisoi pyé mang dsi l’bor shpmin ! Kisoi lo shienn moun ! Kisoi kaméléon ! Kisoi ni gèp si nou téi oi inn kékpar ! Dsi la késtyonn gèp, poitan, nou téi koné sa in zaimo bien itil. Sa i tyé bien shoniy ! Sa i done in bon fritir ! Sansa in bon rogaye. Dizon ni pé apèl sa kavyar La Rényon mé konm nou l’apré anparl in provèrb i fo ni oi dann kèl sans i ansèrv sa. Pa solman dann sans prop mé galman dann sans figiré : lo gèp an késtyon i pé z’ète i mové moun, i pé z’ète osi in kékshoz lé riskab fèr aou d’tor. Donk ou i pé arvaz ali si ou i vé, mé antansyon la konsékans.alé ! Mi lèss azot rofléshi la dsi é ni artrouv pli d’van sipétadyé.