Médam zé Mésyé, la sosyété, koz èk moin, sé koz èk in kouyon mé sé o pyé d’lo mir k’i oi lo bon mason. Mézami, mi pans zot la fine gouté pikir gèp. Si zot la pankor gouté, sé k’zot i viv dann boite koton. La plipar d’tan, kan ou i gingn in pikir gèp sé pars ou la brand son ni an passan. Dann in ka kon msa, gèp i pardone pa ou : li done aou pou la valèr. Dan la sosyété lé in pé konmsa : lo ni sé lo poin for in moun, é i sava pa défyé in moun dsi son poin for. Dsi son poin fèb Ok ! mé dsi son poin for, zamé d’la vi. La pa landroi i fo alé rode ali malol dann zyé.A moins ké ou lé asiré d’où, san pour san. Alé ! Mi kite azot rofléshi la dsi é ni artrouv pli d’van. Sipétadyé.