In kozman pou la rout

« Arzoinn lé dé bout par l’milyé »

12 désanm 2016, sanm Justin

Sa in n’afèr lé dir pou in bonpé d’moun sirtou sak i gingn pa dé mil é dé san. Kozman-la, moin la antann dann la boush mon bann vyé paran é d’apré sak mi kroi sa in kozman i sort dann sid, dizon Lyane, Karos, sansa karéman Sin-Zozèf pars bann z’ansien la raport amoin sa i sort par la-ba. Koman sa l’arivé ? Mi koné pa bien. Mi koné dann la lang fransé i anparl souvan boukl son finn moi, sansa zoinn lé dé bout. Alor mi pans in zour in kasèr d’ti boi la trouv sak moin la mark an-o la é li lété si tèlman kontan par raport la kouyonad li la trouvé ké li la di é ardi é ardi sa, si tèlman ké sa la rès dann somi-lo mo son bann frékantasyon. Sitou pars d’apré li sé in n’afèr i fé in pé ri la boush… mèm si sé in réalité souvan défoi bien difisil pou viv. Alé ! Kass in pé z’ot tète la dsi si zot i vé, é ni artrouv pli d’van sipétadyé.

Padport

Signaler un contenu

Inn modékri, inn ti lavi, inn komantèr ?


Témoignages - 80e année


+ Lus