Zistoir lésans, zistoir pasians !
Ala k’mi lèv samdi matin : radio l’apré bat tanbour déssi in késtyonn grèv lésans. Tantine, trakassé, i di amoin : « Alé mèt in pé lésans dann l’oto akoz i prétan dir na la grèv lindi ! ». Ou koné lo zonm : ou di non, ou lé rousté, apré ou di oui. Téi tonm bien, lèr-la moin lavé in n’afèr présé pou fé : préssé la romèt pli tar ! Stasyon té vid, pa d’problèm !

In koup do tan apré, in sou-préfé i déklar la poin préavi la grèv, tout demoun rant zot kaz : la pa néséssèr fé lanboutéyaz konmsa. La, l’oto i sort partou, kom fourmi landomin koudvan. An o, an ba, dsi l’koté, nana mèm, nana mèm ! Soman pèrsonn i ékout pa lo dénomé sou-préfé. Lanboutéyaz tout la zourné ! Dann in bon pé stasyon, bann l’oto i siss lo pti trépé lésans nana dann bann kiv !

Bann léspri for i kass pa la tète : si demoun i panik, la pa zot touléka, épi lo sou-préfé la di. La di, la pa di ? Sa mi koné pa ! Dimansh i éspas parèy, an dégréné pou in bon pé dmoun... Ni ariv lindi matin, nana la grèv pou vréman : na poin livrézon lésans !
Alor mi pé di rienk in nafèr dovan in bèl tangaz konmsa pou la po patate : "Lé ga ! Arète dékoné !"

Justin