Médam, Mésyé, la sosyété, koz èk moin sé koz èk in kouyon mé o pyé f’lo mir I oi lo bon mason. Mi pé dir azot-mé afèr dir vi k’I tonm sou l’sans- fèr in n’afèr konmsa sé gaspiyé. Lé vré la pate koshon an kari bien préparé, dann la kuizine rényonèz, na poin in bonpé pla i bate ali an gou é an santiman. Solman, fransh vérité, fèr konmsa sé gaspiyé. Mé ni vé, ni vé pa, nou lé dann in sosyété d’gaspiy. Poitan,alon bien rofléshi é alon rapèl anou sak in pé i di dann labatoir shikago, dann koson tout lé bon é i ansèrv tout sof lo kryé bann zanimo. Alor, si laba i gingn fé sa dopi lontan, é banna lé rish, ni pé pa ète pli gaspiyeu ké zot. Sé lo gaspiyaz l’amenn anou oussa ni lé é ni doi rofléshi la dsi. Alé ! mi kite azot é ni artrouv pli d’van. Sipétadyé !