Mésyé, Médam, La Sosyété koz èk moin sé koz èk in kouyon mé sé o pyé d’lo mir k’i oi lo mason. Kozman moin la mark an-o la zordi sa lé koni. Koni koman ? Konm Barabas dan la pasyon d’apré in kozman vyé konm Hérode. Parl fète sa i rapèl amoin in n’afèr : fitintan Témoignages l’avé in biro épi in latlyé Sin-Dni dan la ri Maréchal Leclerc é kan téi ariv midi nou l’avé pou abitid manz nout kass-krout avèk bann zanploiyé. Dé foi bann bazardyé téi pass tèrla é té i vann in pé tousort shoz. In zour néna inn la vann in pti koshon dann in goni é mi rapèl pi kisa mé inn l’ashté san rogardé. La pa riv ali arien so zour-la é mon zistoir i arète la, pars sé sinploman pou dir i fé pa in l’opérasyon dann fénoir pars dé sèrtènn foi ou i kroi fé in bone afèr é ou lé riskab fé in movèz. Dizon i pé fout aou d’dan. Alé ! Mi kite azot rofléshi é ni artrouv pli d’van. Sipétadyé.