Médame zé méssyé, la sossyété, koze èk mwin sé koze èk in kouyon, mé sé o pyé d’lo mir k’i oi lo masson. Mézami, mi panss, si zot lé déza in pé rézonab, zot i koné kossa i lé gouni. Zot i koné sirman sa in zobzé bonpé zizaz.

Avèk gouni wi protèze aou kont la plui, wi pé ossi transporte sak ou la guingn rékipère dann bitassion. Kan l’avé la guèr téi fé ziska linz an goni-sak de jute. Zot i koné lo kozman k’i di konmsa « goni vide i tienbo pa d’boute ». Nou la fine anparlé.

Dann kozman zordi ni parl ashté sansa pa ashté koshon dann gouni. Pou kossa i di sa ? Pars sinploman i oi pa lo zanimo dann lo sak é lé possib si wi rogarde pa bien, ou lé riskab ashté in zanimo mèg, in zanimo malade, sannsa in zanimo la mal fé son kroissans. Lé vré po zanimo, mé lé vré ossi pou toute sorte zafèr wi pé ashté. Parèye si wi maryé avèk in moune san konète so gou, son karaktère, sin limèr é wi apèrssoi, kossa ? Wi apèrssoi ou l’ashté in koshon dann gouni.

Alor mézami méfyé azot, pars zot lé riskab d’ète roulé dan la farine avan konprande kossa l’ariv azot. Sé pou sa, mi konsèye azot bin rofléshi é ni artrouv pli d’van. Sipétadyé.