Oté

« Ashté lo van pou vann l’èr »

In kozman pou la rout

Justin / 22 zwiyé 2019

JPEG - 43.6 ko

Mésyé, Médam, la sosyété, koméla demoun i rode fé biznèss avèk ninport kosa. Zot néna dan l’idé tout z’afèr i transform an larzan, an l’éro si zot i vé. Mi rapèl néna lontan in moun mon famiy téi koné bien l’avé konpar lo pri bann goni dann Sin-Filip, avèk lo pri lo mèm marshandiz dann la komine Sin-Dni é d’apré son kalkil-zépoz zéro é mi rotien tout - a kalkilé avèk in boulyé si posib, li téi doi ramass in bon pé larzan dann in trépé d’tan. Donk li la komans par ashté in kamyon pou transport lo bann goni. Mé oila, lo kamion l’ariv ziska Sin-Filip épi la fé son sharjman gouni é aprésa li la tonm an pane. Si tèlman l’afèr moin la anparl azot la fini an lo d’boudin. Konbien foi i ariv zafèr konmsa ! Konbien foi demoun i pans shanj la pousyèr an l’or é konm i di l’afèr la foir an boté. Alé ! Mi kite azot rofléshi la dsi pou évite tonm dann pyèz konmsa, é ni artrouv pli d’van. Sipétadyé !