Sa i romont dann tan désèrtin moun téi pass kaz-an-kaz pou vann z’ot pti koshon, zot téi transport dsi zot zépol dann in goni. Afèr téi fé sa ? Pars dann bann famiy té i ashète in pti koshon pou grosi ali é pou angrèss ali épi téi tyé k an té fine ariv inn bone grosèr. Mi koné pa si koméla ankor demoun i fé sa-mi pans i doi z-ète rar konm korn lapin. Ladan téi tir la vyann, pou manzé mé galman pou fé salé avèk boukané, lo zo pou la soup, lo trip pou fé boudin avèk sosis, la grèss téi ramass olèrk ansèrv luil-mèm la pans pou fé balon ansanm. Sé dir si in bon koshon in pé kosto téi amenn aou in pé d’tan. Mé antansyon kan ou i ashté in pti koshon ou rogard ali sou tout koutir pars mazine in kou sa lé lade, sansa lo dan la fine kasé é li lé an pène pou manzé. Konm mi di azot souvan dé foi, sa sé lo sans prop.domin nou va oir lo sans figiré. Alé ! Mi lèss azot pou rèv lo tan lontan é ni artrouv pli d’van. Sipétadyé !